مجمع أفسس ووراثة الخطية الأصلية (سلسلة شرح الخطية الأولى، ج1)

 

كتير من المؤمنين بوراثة ذنب ولعنة الخطية الاصلية بيعتقدوا إن مجمع أفسس أيد قرارات مجمع قرطاجنة (دا مجمع غربي مش شرقي يعني لا يمثل كنائسنا ولاهوتنا الأرثوذكسي)، واللي منها إن مجمع قرطاجنة دا دان اللي بيرفضوا وراثة الخطية الأصلية، واللي هي بالأساس عقيدة غربية ظهرت بقوة في العصور الوسطى وقت ضعف الكنيسة الغربية وظهور البروتستانتية..

ولإن بكل أسف المراجع المحترمة دايمًا باللغة الإنجليزية وغيرها من اللغات غير العربية فالعامة بيصدقوا أي شيء يقال لهم..

لكن لو رجعنا لواحد من المراجع العربية المحترمة إلى حد كبير وهو كتاب مجموع الشرع الكنسي للأرشمندريت حنانيا إلياس كساب، واللي بيرجعوا له بردوا معتنقي هذا الفكر في تحدي صارخ لقلة معرفة متابعيهم وانهم لا هيقروا ولا يراجعوا وراهم..

المهم وبالرجوع لجلسات وقوانين مجمع أفسس هنجد الآتي:

1- مش هنلاقي اطلاقًا أي ذكر ولا مرة واحدة لمجمع قرطاجنة دا نهائي، ولا كأنه عقد أصلًا.

2- هنلاقي حرم على كاليستوس واتباعه.. لكن بدون توضيح لسبب الحرم ولأي هرطقة قال بيها كاليستوس فحرم بسببها..

كاليستوس كان تلميذ لواحد اسمه بيلاجيوس، والاتنين كانت هرطقتهم الرئيسية إنهم بينكروا دور النعمة تمامًا في خلاص الإنسان، وكأن الإنسان بيخلص فقط بقدراته وارادته..

لكن تخيل بقى إن مش دا أصلًا سبب حرم مجمع أفسس لكاليستوس!

لكن السبب إن كاليستوس كان بيساند نسطور وكان بيلاقي في نسطور الدعم والملاذ الآمن بعد ما تم الحكم على أفكاره، فبالتالي لإن موضوع مجمع أفسس هو نسطور وهرطقته فحرم كمان كل اللي بيتبعه ويسانده، واللي كان أهمهم كاليستوس..

ودا اللي بيذكره بكل وضوح بعض العلماء في تعليقاتهم على قوانين المجمع، والمذكورة في كتاب مجموع الشرع الكنسي ومرفقة هنا..

وسؤالنا:

- فين في أي جلسة أو قانون ذكر مجمع أفسس مجمع قرطاجنة اللاتيني الغربي؟!