مفهوم عبادة جسد المسيح
إحنا بنعبد جسد المسيح بسجود واحد وبس (اللي هو باليوناني
"بروسكينيسيس")، مش بنعامل الجسد ده كإنه طبيعة تانية منفصلة لوحدها،
ولا كإنه إنسان مستقل واقف جنب ربنا.. لأ، إحنا بنسجد للجسد لإن الجسد ده هو
"جسد الله الكلمة" الخاص بيه جداً، واللي اتحد معاه اتحاد أقنومي كامل.
يعني من الآخر: السجود بيروح للكلمة المتجسد في وحدانيته بجسده الخاص.
1. السجود الواحد للواحد نفسه
كل الكتب والمصادر اللاهوتية الكبيرة بتتفق على أصل واحد: العبادة
مابتتقدمش لطبيعتين ولا لشخصين، العبادة بتتقدم لشخص واحد بس هو هو نفسه
"الرب يسوع المسيح". وعلشان الاتحاد الأقنومي ده، بقا الجسد هو جسد
الله، وعلشان كده الخليقة كلها بتسجد للجسد مع اللاهوت سجدة واحدة مش سجدتين.
القديس كيرلس في "الحرم الثامن" بيأكد إننا مابنعبدش إنسان
واقف "جنب" الكلمة، لإننا لو عملنا كده كأننا بنقول إن فيه ابنين مش ابن
واحد، لأ.. إحنا بنعبد "الواحد نفسه" بسجود واحد. والكتاب بيوضح إن
الجسد ده هو "جسد الله"، وعشان كده من حقه العبادة لإن بقا جسد الكلمة
اللي بقا إنسان، مش لإن إنسان مستقل لوحده.
القديس كيرلس هنا بيقفل الباب خالص على أي حد عايز يقسم المسيح.
بيقولك لو عبدت اللاهوت لوحده والناسوت لوحده، يبقا إنت كده عندك مسيحين وابنين!
وده غلط تماماً. هو شخص واحد، والجسد مالهوش وجود بره أقنوم الكلمة، بقى خاص بيه هو، فالسجود رايح للواحد ده بكل ما
له.
القديس ساويرس الأنطاكي بيشرح إن "المسيح الواحد بتسجد له سجدة
واحدة" من كل الخليقة، لإن هو الله الكلمة اللي اتحد بجسد حقيقي فيه نفس
عاقلة. وساويرس بيرفض تماماً تعبير "السجود المشترك"، لإن كلمة
"مشترك" دي بتوحي إن فيه اتنين (إله وإنسان) متصاحبين أو مقترنين في
الكرامة، لكن هو بيأكد إن العبادة هي للكلمة المتجسد في وحدته.
(كتاب "الخريستولوجي" لإيان تورانس (صفحة 190 و191)).
ساويرس هنا بيحارب فكرة "الشركة" اللي بتفصل بين الاتنين.
لو قلت "سجود مشترك" يبقا إنت شايف شخصين قاعدين جنب بعض وبتقولهم
"إحنا بنسجد لكم إنتوا الاتنين سوا". لأ، المسيح مش اتنين، هو لاهوت
اتحد بناسوت (جسد ونفس عاقلة)، وبقا مسيح واحد، فالسجود مفيش فيه "شركة"
بل هو سجود واحد لواحد.
2. رفض عبادة "الإنسان" (الرد على نسطور)
فكرة إننا نسجد لجسد المسيح باعتباره "إنسان شايل جواه
ربنا" دي فكرة مرفوضة ومرفوضة جداً، لإن العبادة مابتتقدمش لغير الله وحده.
إحنا بنؤمن بإله واحد، هو نفسه اللي ولدته مريم العذراء، وهو نفسه
اللي بنعبده. فاللي بيعمل المعجزات واللي اتألم بالجسد هو إله واحد، وعشان كده
بنعبد "الواحد" ده بكل اللي يخصه. والنص بيأكد إن المسيح مش "إنسان
عادي" ربنا سكن جواه، لأ.. ده الله الكلمة اللي بقا هو نفسه جسد، وعلشان كده
جسده ده هو جسده الخاص المحيي اللي يستحق السجود.
من كتاب "التعليم الخريستولوجي عند الآباء الأقباط" (صفحة
244 و245)
ده الرد القاطع على فكرة نسطور. نسطور كان شايف إن المسيح إنسان مميز
جداً وربنا حل جواه زي ما بيحل في هيكل أو بيت. والآباء بيردوا على دا بإن الفاعل
واحد. يعني اللي عمل المعجزة وأقام العازر هو هو نفسه اللي جاع وتعب واتصلب ومات
بالجسد. طالما الفاعل واحد، يبقا الجسد ده مش بتاع إنسان عادي، ده جسد الله الكلمة
اللي أصبح بيدي حياة، وعلشان كده السجود ليه فرض واجب لإنك بتسجد لله المتجسد.
ليست هناك تعليقات:
إرسال تعليق